28 sen
ADNSU ərazi partiya təşkilatına sədr seçilib
Sentyabrın 28-də Azərbaycan Dövlət Neft və Sənaye Universitetinin (ADNSU) nəzdində fəaliyyət göstərən Azərbaycan-Fransız Universitetində YAP Nəsimi Rayon Təşkilatı Azadlıq prospekti 20 üzrə - Azərbaycan Dövlət Neft və Sənaye Universiteti ərazi partiya təşkilatının seçki yığıncağı keçirilib.
AzEdu.az xəbər verir ki, tədbirdə ADNSU-nun rektor əvəzi, dosent Vazeh Əskərov, YAP-ın Nəsimi Rayon Təşkilatının sədri Azər Süleymanov, hər iki təhsil müəssisəsinin professor-müəllim heyəti iştirak edib. Hesabat-seçki yığıncağında öncə Yeni Azərbaycan Partiyasının qurucusu, ulu öndər Heydər Əliyevin və Vətən müharibəsində şəhid olan qəhrəmanlarımızın əziz xatirəsi bir dəqiqəlik sükutla yad edilib. Sonra YAP-ın Nəsimi Rayon Təşkilatının sədri Azər Süleymanov çıxış edərək YAP-ın yaranması ərəfəsində ölkədə olan siyasi vəziyyətdən bəhs edib və bildirib ki, Azərbaycan tarixinin son dərəcə ağır və keşməkeşli günlərində - ölkənin ciddi sınaqlarla üz-üzə qaldığı bir dövrdə yaranan partiya gənc dövlətin bütün çətinlikləri yenərək möhkəmlənməsi və inkişafının əsasını təşkil etdi.
O, qeyd edib ki, YAP-ın yaranması və 1993-cü ilin oktyabrında partiyanın sədri ulu öndər Heydər Əliyevin xalqın istəyi ilə Prezident seçilməsi Azərbaycanda yeni dövrün, yeni inkişaf mərhələsinin əsasını qoyub.
ADNSU-nun rektor əvəzi, dosent Vazeh Əskərov çıxışında YAP-ın yaranma zərurətindən və ölkəmizin inkişafındakı əvəzsiz xidmətlərindən danışıb və bildirib ki, zamanında edilən düzgün seçim və xalqımızın YAP ətrafında sıx birləşərək ölkənin inkişafına təkan verməsi bu gün artıq öz nəticəsini verməkdədir. Ölkəmizin ictimai-siyasi həyatında aparıcı rol oynayan, ulu öndər Heydər Əliyevin əsasını qoyduğu Yeni Azərbaycan Partiyasının yarandığı gündən xalqın partiyasına çevrildiyini deyən Vazeh Əskərov ölkəmizin bütün istiqamətlərdə qazandığı uğurlardan danışıb.
ADNSU-nun YAP ilk təşkilatının sədr müavini, dosent Tamilla Naibova hesabat məruzəsi ilə çıxış etdikdən sonra yeni sədrin - təklif olunan namizədin seçilməsi səsverməyə çıxarılıb. Belə ki, ADNSU-nun İKT şöbəsinin müdiri Salman Salmanov Azərbaycan Dövlət Neft və Sənaye Universiteti ərazi partiya təşkilatının sədri, dosent Tamilla Naibova isə sədrin müavini vəzifəsinə seçilib.
Ona göstərilən etimada görə minnətdarlığını bildirən Salman Salmanov Azərbaycanda gənclərin hər zaman diqqət və qayğı ilə əhatə olunmasından, onların sağlam və savadlı, o cümlədən layiqli vətəndaş kimi formalaşması istiqamətində dövət səviyyəsində aparılan islahatlardan danışıb. O qeyd edib ki, YAP həm də gənclərin partiyasıdır və YAP-ın üzvü olan ADNSU əməkdaşlarının universitetin və cəmiyyətin həyatında aktiv olacağına əminliyini bildirib. Sonda YAP-a yeni üzv olan gənclərə vəsiqələr təqdim olunub.
116
