Uğurlu karyeranın ilk addımı düzgün yazılmış CV (Curriculum Vitae) ilə başlayır. CV işəgötürənə sizin təcrübəniz, bacarıqlarınız və təhsiliniz haqqında qısa və dəqiq məlumat verir. CV-ni necə yazmaq lazımdır? Bu bloqda sizə addım-addım izah edəcəyik.

1. Şəxsi Məlumatlar

CV-nin başında şəxsi məlumatlarınız yer almalıdır. Bu bölümdə aşağıdakılar olmalıdır:

• Ad və soyad
• Telefon nömrəsi
• Email ünvanı
• Ünvan (istəyə bağlı)

2. Qısa Özünüz Haqqında (Profil)

İşəgötürənlər çox zaman CV-yə baxmaq üçün az vaxt ayırırlar. Buna görə də, qısa və diqqətçəkici bir profil bölümü yazmalısınız. Burada peşəkar bacarıqlarınız və bu sahədəki məqsədləriniz haqqında qısa məlumat verin.

Nümunə: “İT sahəsində 5 il təcrübəyə malik bir mütəxəssis olaraq, sistem inzibatçılığı və şəbəkə idarəçiliyi üzrə dərin biliklərə sahibəm. Təcrübəmi genişləndirmək və yeni texnologiyaları öyrənməklə şirkətinizə dəyər qatmağa hazıram.”

3. İş Təcrübəsi

Ən önəmli bölümdür. İş təcrübəniz varsa, onu tərs xronoloji ardıcıllıqla yazmalısınız (ən son işdən başlayaraq). Hər təcrübənizi yazarkən aşağıdakılara diqqət yetirin:

• Şirkətin adı
• İşlədiyiniz tarix aralığı
• Vəzifə adı
• Vəzifəniz çərçivəsində yerinə yetirdiyiniz əsas vəzifələr və nailiyyətlər

Nümunə: Sistem inzibatçısı – teston mmc Şirkəti
2019 – 2023

• Şəbəkə və server idarəçiliyi
• Sistem təhlükəsizliyini təmin etmək
• Yeni proqram təminatlarının quraşdırılması

4. Təhsil

Təhsil bölməsində əldə etdiyiniz diplomları və sertifikatları qeyd edin. Bu bölümü də tərs xronoloji qaydada təqdim edin. Təhsil müəssisəsinin adını, təhsil müddətini və ixtisasınızı yazmağınız kifayətdir. Əlavə olaraq, dərəcə və ya fərqlənmə varsa, bunu da qeyd edin.

Nümunə: Azərbaycan Texniki Universiteti
2015 – 2019
Bakalavr: İnformasiya Texnologiyaları

5. Bacarıqlar

Bu bölümdə iş üçün vacib olan texniki və şəxsi bacarıqlarınızı yazın. Məsələn, dil bacarıqları, proqramlaşdırma dilləri, idarəetmə bacarıqları və s.

Nümunə:

• Linux və Windows sistemləri üzrə təcrübə
• SQL bilikləri
• İngilis dili – Yüksək səviyyədə

6. Sertifikatlar və Kurslar

Əgər hər hansı əlavə təlim və ya sertifikatlar əldə etmisinizsə, bu bölmədə onları qeyd edin. Bu sizin sahənizdə nə qədər öyrənməyə açıq olduğunuzu göstərir.

Nümunə:

• RHCSA (Red Hat Certified System Administrator) – 2024
• CCNA (Cisco Certified Network Associate) – 2023

7. Referanslar (İstəyə bağlı)

Əgər işəgötürənlər sizdən referans istəyirsə, bu bölümdə referanslarınızı qeyd edə bilərsiniz və ya sadəcə "Referanslar tələb olunduqda təqdim ediləcəkdir" deyə yaza bilərsiniz.

8. Dizayn və Uzunluq

CV-niz vizual olaraq sadə və oxunaqlı olmalıdır. Məlumatlar 1-2 səhifəyə sığdırılmalı və çox uzadılmamalıdır. Hər bölməni başlıqlarla ayıraraq strukturlaşdırılmış bir görünüş yaradın.

CV sizin işəgötürənlə ilk təmasınızdır. Ona görə də, səliqəli, dəqiq və diqqətçəkici olmalıdır. Hər zaman CV-nizi yeniləyin və işəgötürənin tələblərinə uyğunlaşdırmağa çalışın.