Xəbər verdiyimiz kimi, ötən gün elm və təhsil naziri Emin Əmrullayevin müvafiq əmrinə əsasən Ülkər Səttərova Elm və Ali Təhsil üzrə Dövlət Agentliyinin, Ceyhun Kərəmov Peşə Təhsili üzrə Dövlət Agentliyinin, Eşqi Bağırov isə Məktəbəqədər və Ümumi Təhsil üzrə Dövlət Agentliyinin direktorları vəzifələrinə təyin olunublar.

Sözügedən kadr islahatları təhsilin keyfiyyətinə nə dərəcədə təsir göstərəcək? Təhsildə yaranan problemləri aradan qaldırmaq  üçün hansı işlər görülməlidir?

Bu barədə AzEdu.az-a açıqlama verən deputat Ceyhun Məmmədov  kadr dəyişikliklərini müsbət qiymətləndirir:

“Düşünürəm ki, bölgünün bu cür aparılmağı səmərəlidir. Qarşıda duran vəzifə təhsillə bağlı islahatların sürətləndirilməsi və təhsilin keyfiyyətinin artırılmasıdır. Bu gün hələ də cəmiyyətdə təhsillə bağlı insanları narahat edən, düşündürən məsələlər var. Bunlar aradan qaldırılmalıdır.

Deputat qeyd edib ki, hazırda peşə təhsilinə yönələn tələbələrin sayı azdır:

“Peşə təhsili ilə bağlı genişmiqyaslı islahatlar aparılmalıdır. Yüksək infrastrukturun yaradılmasına baxmayaraq, gənclərdə peşə təhsilinə güclü maraq formalaşmayıb. Marağın artırılması baxımından bir sıra işlər görülməlidir. Dövlət bu sahədə öz öhtəliklərini yerinə yetirib. Günü-gündən yeni təhsil müəssisələri fəaliyyət göstərir. Bizə düşən iş, gənclərimizi peşə təhsilinə cəlb etməkdir”.

 C.Məmmədov vurğulayıb ki, Regional Təhsil İdarələrinin fəaliyyəti ilə ciddi məşğul olmaq lazımdır:

"Onları yaradıb, nəzarətsiz qoymaq olmaz. Məktəblərdə yalnız imtahan və müsahibə yolu ilə direktor təyinatları yetərsizdir. Bu zaman təcrübəsiz kadrların ümumtəhsil müəssisələrini idarə edə bilmədiklərini və müəyyən səhvlər buraxdıqlarının şahidi oluruq.Həmçinin, direktorların və müəllimlərin işə qəbulu zamanı əmrlər gec verilir. Bu da özlüyündə uğursuz nəticələr doğurur. Sözügedən problemlərin aradan qaldırılması üçün ciddi islahatlar aparılmalıdır”.  

Müsahibimizin sözlərinə görə AMEA - nın bir sıra institutları Elm və Təhsil Nazirliyinə verilsə də hələ ki, əməkdaşlıq sahəsində yeniliklər görülmür:

“Bir müddət əvvəl Azərbaycan Milli Elmlər Akademiyasının nəzdində fəaliyyət göstərən bir sıra institutların Elm və Təhsil Nazirliyinə tabe edilməsi barədə qərar verildi. Gözləntilər ondan ibarət idi ki, nazirliyin yeni strukturları yaradılacaq və təhsilimizdə yeni mərhələyə qədəm qoyulacaq. Lakin bir sıra sahələrdə problemlər hələ də qalmaqdadır. Bu problemlərdən biri plagiatların geniş vüsət alması, gənclərin elmi araşdırmalara marağının olmamasıdır. Həmçinin, alimlərin həyat şəraitləri yüksəldilməlidir”.

Həmsöhbətimizin sözlərinə görə həm ali, həm peşə, həm də orta təhsil sahələrində ciddi problemlər var:

“Elm və Təhsil Nazirliyinin kadrları peşəkar təhsil işçiləri ilə gücləndirilməlidir. Ölkəmizdə “Gəncləşmə” siyasətinin keçirilməsi müsbət haldır, lakin yaşlı nəslin təcrübələrindən mütləq istifadə etməliyik. Məhz müəllimlik sahəsində təhsillə bərabər təcrübənin də rolu var".

 Sifayə Abbas